Lur gorrian barrena disko-liburua, lan jostari eta jostagarria

2012ko urtarrilak 17, asteartea

Xabi Strubell musikariak, ipuinaren idazle Eneko Haritzak, eta Yoana Figueras ilustratzaileak Lur gorrian barrena disko-liburua aurkeztu dute, gaur, Donostian. Liburu-dendetan salgai dago eta, laster, haurrentzako tailerrak egingo ditugu ikastetxe eta kultur etxeetan. Aurkezpenean, Maluta argitaletxeko arduradun Sabrina Mizobe eta Ritxi Lizartza ere egon dira. Argazkia eskuratu nahi baduzu, egin klik hemen.

Lur gorrian barrena lanean, haurrentzako kanta tradizionalak bildu eta doinu propioak jarriz osatu du disko jostaria Xabi Strubellek. Eneko Haritzak kantu horiek ezagutzen joango diren hiru animalia gorriren inguruko ipuina idatzi du, eta Ainara Lasak narrazioei ahotsa jarri die. Ilustrazioak eta koloreztatzeko marrazkiak, berriz, Bi tanta diseinu agentziako Yoana Figuerasek egin ditu.

Lan jostari eta jostagarria da disko-liburua, haurrei ipuinak irakurri, entzun, irudiak ikusi, margotu, abestiak entzun eta abesteko aukera ematen baitie. Horrez gain, beste bi ipuin liburu ere aurkeztu ditu Malutak gaur: Mari, haitzuloetako dama eta Tartalo begibakarra. Aipatutako lan guztiak Maluta argitaletxearen webgunean eskura daitezke.